Не останала никаква лузна
на неговото набрчкано чело
од грижа самотност замисла
од негови дамнешни љубови
кои успеал многу болно
многу долготрајно
да ги сочува во себе свои
никому откриени замолчени
а не биле малку а не биле
ни многу за паметење
а многу биле минливи
никогаш не биле некогаш
како во секој човек во огон
и нему низ животот му минала
една од сите негови љубови
која се надева дека ќе ја има
сегде кај што бил и не бил
додека бил жив
додека умирал рамнодушно
во пустошијава
се разбира најдлабока
се разбира најзагадочна
се разбира најтаена
се разбира нему најубава
и се разбира најдолготрајна
во свеста за вредностите
на животворноста
од неговите многу љубови
таа една му е сè поблиска
колку што му е сè подалечна
како што е вообичаено
за една од многу
непреживеани и ненадживеани.

ОГОН ВО ПУСТОШИЈА, Мразнина, поетска студија, 64