Екипажот на „Артемис II“ денес влегува во завршната и најризична фаза од летот, откако капсулата „Орајон“ го продолжи патот назад кон Земјата по успешно извршената втора корекција на траекторијата за враќање. Според официјалниот распоред на NASA за завршната фаза на мисијата, splashdown во Тихиот Океан, во близина на Сан Диего, е планиран за 10 април во 20:07 по источноамериканско време, односно на 11 април во 02:07 по македонско време.
Историска мисија околу Месечината
„Артемис II“ е првата мисија со екипаж во рамки на обновената лунарна програма на NASA и првиот човечки лет околу Месечината по повеќе од 50 години. Во екипажот се Рид Вајсман, Виктор Гловер, Кристина Кох и Џереми Хансен, а нивниот лет се следи како клучен чекор пред идните човечки слетувања на Месечината.
Поставен е и нов рекорд
За време на мисијата, екипажот постави и нов рекорд за најдалечен човечки лет во историјата, достигнувајќи оддалеченост од 252.756 милји од Земјата. Со тоа „Артемис II“ влезе во историјата уште пред да започне најтешкиот дел – враќањето низ атмосферата.
Што следи во наредните часови
Според официјалната временска рамка на NASA, пред splashdown следуваат финална подготовка на кабината, последни технички постапки, раздвојување на модулите и повторно влегување во атмосферата. Токму оваа фаза се смета за најчувствителна, бидејќи тогаш се тестираат системите за топлинска заштита, стабилност и безбедно спуштање на екипажот.
По спуштањето во океанот, астронаутите треба да бидат преземени од тимовите за опоравување и префрлени на брод, по што ќе следат првични медицински проверки. Ако оваа завршна етапа помине според планот, „Артемис II“ ќе остане запаметена како мисија што успешно го врати човекот на патеката околу Месечината и го отвори следниот чекор кон новата лунарна ера.
